Беларусь

Што чытае сучасная моладзь?..


Многія гавораць, што цяперашняя моладзь мала часу надае кнігам. Не згодна, мы чытаем, але наша літаратура – гэта, у асноўным, сучасныя пісьменнікі. Яны ведаюць, які сюжэт зможа зацікавіць падлетка. Але і класіка многім падабаецца.
Мой любімы пісьменнік – Конан Дойл, і ўсе яго кнігі выдатныя, на мой погляд. Самая любімая – “Запіскі аб Шэрлаку Холмсе”. Творы гэтага аўтара вучаць ісці наперад і ніколі не здавацца, верыць у сябе і ў свае сілы, і тады ты зможаш дасягнуць таго, чаго жадаеш больш за ўсё на свеце. Не апошнюю ролю ў маім жыцці займае таксама пісьменнік Паўла Каэльа. Яго кнігі “Пятая гара” і “Алхімік” многаму навучылі мяне. А ў дзяцінстве я вельмі любіла Кіра Булычова, магла цэлымі днямі чытаць аб прыгодах Алісы.
Каб даказаць, што моладзь у нас не такая дрэнная, як некаторыя лічаць, даведаемся, якія творы чытаюць сучасныя падлеткі.
Алеся Кадзевіч, 16 гадоў:
— Мая любімая кніга – “Байцоўскі клуб” Чака Паланіка. Да гэтага я захаплялася творамі гэтага аўтара, але гэта кніга зрабіла на мяне самае яркае ўражанне. Чак Паланік – вельмі эксцэнтрычны пісьменнік, і гэтая кніга – прамое таму пацверджанне. Яна апавядае аб рэчаіснасці нашага жыцця і, дзякуючы ёй, я лепш стала разумець псіхалогію. Гэтая кніга – на аматара, але я думаю, прачытаць яе варта.
Аляксандра Ярмолік,17 гадоў:
— Нядаўна я даведалася аб выдатным пісьменніку – Віктару Пялевіну, і яго твор “Бубен ніжняга свету” імгненна стаў маёй любімай кнігай. Мяне прыцягнула назва, яна, насамрэч, дзіўная, а сюжэт незвычайны. Мне гэта кніга падаецца выключна мастацкім творам, і я не бачу ў ёй утоенага сэнсу, але вы, магчыма, знойдзеце штосьці іншае. Увогуле, я не шкадую затрачанага часу і шчыра раю вам у вольную хвілінку прачытаць “Бубен ніжняга свету”.
Аніта Пацехіна,18 гадоў:
— Я адразу і не магу сказаць, якая кніга ў мяне любімая, бо я прачытала вельмі шмат твораў розных жанраў і розных пісьменнікаў. Але магу сказаць, што адна з любімых – “Сем дзён Стварэння” Марка Леві. У гэтай кнізе нашмат больш сэнсу, чым падаецца на першы погляд. Я думаю, што кожны зможа вынесці для сябе, нешта карыснае з гэтага твора. Я, напрыклад, навучылася радавацца дробязям, і жыццё зараз успрымаецца нашмат прасцей. Прачытайце гэтую кнігу, і я гарантую: вы не пашкадуеце.
Кніга будзе існаваць заўсёды, таму што яе роля ўсё яшчэ важная для людзей. Яна дапамагае нам развіваць сваё “я”, дапамагае расці духоўна і маральна, кніга вучыць нас, і кніга робіць чалавека Чалавекам.
Аляксандра ГУЛІЦКАЯ,
вучаніца ліцэя № 1,
юнкар “НТ”,
г. Баранавічы.

Што чытае сучасная моладзь?..
Оцените статью

Добавить комментарий

Авторизация
*
*
Генерация пароля