У Чарнаўчыцкай школе прайшла выстава гурткоў цэнтра творчасці дзяцей і моладзі Брэсцкага раёна

Цэлы год рупіліся школьнікі ў розных гуртках, спасцігалі сакрэты творчыя і тэхнічныя, прыдумвалі і рабілі сваімі рукамі розныя рэчы. І дзеці могуць быць творцамі цудаў!

Бацькі, настаўнікі, вучні з цікавасцю разглядалі работы юных вышывальшчыц, якія пад кіраўніцтвам Зінаіды Леанідаўны Кайко ў гуртку “Родныя ўзоры” адкрылі свет пяльцаў, іголак, нітак. Вышыванне, як кажуць нашы равесніцы, – гэта не сумна. Верым, бо калі б Люба Ланшакова сумавала, то ці змагла б яна вышыць такі цудоўны падарунак для мамы – кампазіцыю “Анюціны вочкі”? А вось Аліна Рыкава любіць упрыгожваць свае работы традыцыйнымі беларускімі ўзорамі. Народны арнамент у яе і на ручніках, і на сурвэтках, і на пано. Упрыгожылі выставу і работы Віялеты Плісюк, Каці Мацвей, Вікторыі Бабіч.
Здзівілі выхаванцы гуртка “Прырода і фантазія”. Сухое лісце, кара, мох, зерне ў іх руках ператварыліся ў цудоўныя пейзажы, лясныя скульптуры, прыгожыя аплікацыі. Даша Беразоўская, Ліза Казлякоўская, Саша Пракапчук, Таня Кучко і іншыя разам з кіраўніком гуртка Таццянай Мікалаеўнай Шчарбачэнка парадаваліся, што змаглі ў чарговы раз уразіць і дарослых, і дзяцей. Прынамсі, тое ж зрабілі і выхаванцы гуртка тэхнічнай творчасці, якім кіруе Аляксандр Васільевіч Амяльчук. Макеты яхт, танкаў, самалётаў, аўтамабіляў так і прыцягвалі ўвагу наведвальнікаў выставы. Усё ж такі залатыя рукі ў Вані Сітара, Славы Тура, Мар’яна Лясоты, Сашы Капусцюка і іх сяброў. Так трымаць, хлопцы!
Анастасія ТРАФІМУК,
Ірына ДУНЬКО,
гурток “Літаратурная
творчасць” ЦТДМ,
Брэсцкі раён.