У калектыве сельскага вучэбна-педагагічнага комплексу даўно сімпатызуюць беларускамоўнаму абласному выданню
Дзяржаўны вучэбна-педагагічны комплекс дзіцячы сад – пачатковая школа вёскі Вяз мае некалькі адметнасцей, на якія міжволі звяртаеш увагу. Па-першае, гэта малакамплектная адукацыйная ўстанова, у якой хоць і невялікі калектыў дзяцей і дарослых, але вельмі дружны. Па-другое, тут ужо 7 год практыкуецца інтэгрыраванае навучанне, калі разам займаюцца і здаровыя дзеткі, і тыя, у каго ёсць пэўныя праблемы ў псіхафізічным развіцці. Вынік – цяжкасці тут умеюць пераадольваць разам, а чалавечнасць у адносінах увасабляецца ў рэчаіснасць, пачынаючы з дашкольнага ўзросту. Між іншым, першымі ў раёне вязаўскія педагогі сталі практыкаваць дашкольнае навучанне дома, каб ніводнае дзіця не было адарвана ад соцыуму.
Трэцяя асаблівасць – дагледжаная тэрыторыя сада-школы. На ёй ёсць дзе і пагуляць, і ўрок на паветры правесці. Традыцыі плюс крэатыў –
стыль вучэбна-педагагічнага комплексу. Не дзіва, бо кіруе ім уладальнік тытула “Кіраўнік – творчая асоба” Любоў Лінкевіч. Вось вам і чацвёртая асаблівасць. Дарэчы, Любоў Іванаўна ў свой час пераехала з сям’ёй жыць у Пінск, але вязаўскай установе адукацыі не здрадзіла – і сёння штодня ездзіць сюды на работу з горада.
Чаму ж мы пра Вязаўскую дзіцячы сад – пачатковую школу ўзгадваем у рубрыцы “Сябры “НТ”? Дык справа ў пятай адметнасці: абласную газету тут выпісваюць даўно – і па ведамаснай падпісцы, і па індывідуальнай. Чытаюць “Народную трыбуну” ўсе ў калектыве, часцяком абмяркоўваюць артыкулы. “Найперш шукаем, што напісана пра Піншчыну, – тлумачыць дырэктар Любоў Лінкевіч. – Цікава даведацца і пра справы ў калег – педагогаў з іншых раёнаў”.
Высветлілася, што комплекс працуе на беларускай мове: і з дашкольнікамі, і з вучнямі пачатковай школы гавораць па-беларуску. Так што выбар на карысць “НТ” зразумелы. Безумоўна, прыемна было даведацца аб сімпатыях да нашага выдання выхавальнікаў Ганны Пашэлюк і Галіны Козел, шэф-повара Галіны Неўдах, памочніка выхавальніка Святланы Кахавец, прыбіральшчыцы Марыі Антаноўскай, настаўніцы Таццяны Сухаверхай, загадчыка гаспадаркі Анастасіі Малашчыцкай. Разам з Любоўю Лінкевіч (на здымку – трэцяя злева) калектыў прадоўжыць сяброўства з любімым выданнем і ў 2012 годзе.
Святлана ТАБОЛІЧ, “НТ”,
Пінскі раён.
Фота аўтара.