Новы дзіцячы дом сямейнага тыпу адкрыўся ў вёсцы Вялікая Турна Камянецкага раёна
Пасялілася тут вялікая сям’я Таццяны і Дзмітрыя Якавукоў. Акрамя дарослай дачкі і сына-школьніка, у іх яшчэ сямёра прыёмных дзяцей ва ўзросце ад 2 да 12 гадоў.
ВЯЛІКІ ДОМ
Некалькі гадоў таму Беларускі саюз жанчын выступіў з ініцыятывай “Ні аднаго кінутага дзіцяці”. Гэту акцыю падтрымала кіраўніцтва ААТ “ААБ Беларусбанк”. Было вырашана за свае сродкі пабудаваць у кожным рэгіёне рэспублікі па аднаму дзіцячаму дому сямейнага тыпу. На Брэстчыне высакародную ідэю рэалізаваў калектыў абласнога ўпраўлення “Беларусбанка” на чале з Віктарам Лечанковым.
Для будаўніцтва выбралі Вялікую Турну, бо ў гэтай вёсцы знайшоўся добры ўчастак зямлі пад сацыяльны аб’ект, ды і ўся неабходная інфраструктура маецца – школа, дзіцячы садок. Двухпавярховы асабняк атрымаўся на захапленне: пяць спальняў, гасціная, гульнявы пакой абстаўлены ўтульнай і зручнай мэбляй. А на наваселле банкіры падарылі яшчэ і неабходную бытавую тэхніку – халадзільнік, тэлевізар, духоўку, мікрахвалёўку і іншыя рэчы. Не засталіся ўбаку і мясцовыя ўлады: старшыня райвыканкама Андрэй Пісарык перадаў дзеткам новенькі камп’ютар.
ВЯЛІКАЯ СЯМ’Я
Не думала Таццяна Якавук, што стане шматдзетнай мамай. Жылі з мужам у горадзе Высокае, выхоўвалі дачку Святлану. Дзяўчынка расла і вельмі любіла бавіцца з суседскімі дзеткамі, а бацькоў прасіла “купіць” браціка ці сястрычку. Толькі праз 18 гадоў нарадзіўся хлопчык Давід. Святлана вырасла і паехала працаваць у Брэст. Цяпер падрастаў ужо Давід і таксама стаў скардзіцца на адзіноту. Пакуль бацькі ўвесь дзень на працы, хлопчык кожную вольную хвіліну праводзіў у суседзяў Баневічаў. Там было весела: вялікая сям’я, аж чацвёра дзяцей. Вось тады і задумалі Якавукі ўзяць у сям’ю прыёмнага хлопчыка. Павел аказаўся на рэдкасць добрым і ветлівым. І хоць вучоба яму даецца нялёгка, затое ён вельмі працавіты – першы памочнік па гаспадарцы. А тут яшчэ і старэйшая дачка Святлана вярнулася назад у Высокае. Аднойчы менавіта яна ўгаварыла маму паглядзець у камянецкай бальніцы двух кінутых немаўлят. Жаночыя сэрцы не вытрымалі – і сям’я павялічылася яшчэ на два чалавекі.
На прадпрыемстве “Белавежскія сыры”, дзе працавалі муж і жонка Якавукі, калі даведаліся аб гэтым, аднесліся з разуменнем і адабрэннем. Прапанавалі Таццяне гібкі графік работы, усяляк дапамагалі, але ўсё роўна часу на дзяцей не хапала. Вось тут і паступіла ёй прапанова стаць гаспадыняй у новым дзіцячым доме сямейнага тыпу, які будавала абласное ўпраўленне “Беларусбанка”. Сям’я падтрымала Таццяну Анатольеўну – і муж, і бабулі, і дарослая дачка.
Далей пайшло-паехала. Новы дом у Вялікай Турне быў разлічаны на выхаванне шасці непаўналетніх дзяцей. Таму і вырашылі Якавукі ўзяць яшчэ дваіх малых, ды лёс звёў адразу з чатырма. Ну, што тут было рабіць? Не разлучаць жа брацікаў і сястрычак.
Цяпер у Таццяны і Дзмітрыя 8 дзетак, не лічачы дарослай дачкі Святланы. І, па іх словах, усё ў сям’і пароўну – і гасцінцы, і бацькоўская любоў.
Юрый МАКАРЧУК, “НТ”,
Камянецкі раён.
Фота аўтара.
Новы дзіцячы дом сямейнага тыпу – на Камянеччыне
