Яблычны пірог з… маянэзам

ПІРОГ “ЯБЛЫЧНЫ КАПРЫЗ” ад Вольгі ФЕЛЬКІНАЙ, дэкана філалагічнага факультэта БрДУ імя А.С. Пушкіна:
– Шчыра кажучы, не часта даводзіцца песціць сябе ласункамі, бо, як і належыць сучаснай жанчыне, імкнуся сачыць за фігурай. Дамачадцы не скардзяцца, а дачка нават бярэ прыклад з мамы. Ды час ад часу можна даць сабе невялічкую слабінку. З радасцю выпякаю для сваёй сям’і пірог “Яблычны капрыз”. Унікальнасць рэцэпта ў тым, што ў цеста дадаецца маянэз. За кошт гэтага яно атрымліваецца мяккім, падобным да бісквітнага.
Нам спатрэбяцца: яблыкі (асабіста я бяру антонаўку), 1 яйка, паўшклянкі цукру, шклянка мукі, 1 чайная лыжка соды, маленькі пакецік маянэзу (прыкладна 180-200 г).
Робім цеста: змешваем інгрэдыенты і сочым, каб атрыманая маса нагадвала смятану. Яблыкі рэжам на кавалачкі, пасля выкладваем іх на змазаную алеем і пасыпаную сухарамі форму. Заліваем цестам і пячом да поўнай гатоўнасці. Перад тым, як падаць пірог да стала, варта яго перавярнуць, каб яблыкі апынуліся зверху. Апошні штрых – пасыплем ласунак цукровай пудрай і карыцай.
Усё, можна каштаваць! Пірог літаральна растае ў роце! Спадзяюся, чытачы “Народнай трыбуны” не пашкадуюць, калі скарыстаюцца гэтым простым рэцэптам.