ГАРОДНІНА “АГУРКОВЫЯ ВАРЫЯЦЫІ” ад Тамары ЛЕБЯДЗЕЎСКАЙ, начальніка аддзела культуры Пінскага райвыканкама:
– Так хочацца прадоўжыць летні вітамінны сезон! Для гэтага зусім не абавязкова быць чараўніцай. Усяго толькі і трэба – не ленавацца і скласці вітаміны ў слоік. Прапаную зрабіць на зіму “Агурковыя варыяцыі”. Асаблівасць гэтых рэцэптаў – адсутнасць воцату. Гэта значыць, што ў слоіках атрымаецца захаваць максімальна натуральны смак агуркоў.
Варыяцыя №1. Агуркі мыем. Вялікія плады надзярэм на буйнай тарцы, сярэднія будзем складваць у трохлітровыя слоікі. На адзін слоік бярэм: 3 зубочкі часнаку, ліст хрэну, 3 лісточкі парэчак, 4 – вішні, 2-3 сцябліны кропу з зонцікамі. Спецыі кладзём на дно слоіка, на іх – слой агуркоў, які перакладаем надзёртымі агуркамі, каб маса запоўніла пустоты (порцыі надзёртых агуркоў трэба папярэдне пасаліць з разліку 3 сталовыя лыжкі солі на 3-літровы слоік). Затым зноў укладваем агуркі, далей – агурковая маса, і так паслойна запаўняем посуд поўнасцю. Закрываем капронавай накрыўкай і адпраўляем у халоднае месца (склеп ці халадзільнік).
Варыяцыя №2. У слоік складваем 3-4 зубочкі часнаку, столькі ж лістоў парэчак, ліст ці корань хрэну, кроп. На 1 літр вады спатрэбіцца 1 сталовая лыжка солі, на 3-літровы слоік – 1,5 літра вады. Ваду закіпяціць, у кіпені растварыць соль, заліць расол у слоік і адразу закатаць бляшанай накрыўкай. Слоікі пераварочваем і пакідаем на 3 дні у цёмным кутку, потым вяртаем іх у нармальнае становішча і пакідаем на 2 дні, але ўжо на святле. Пасля захоўваем агуркі прамога пасолу ў халодным месцы.
Частуйцеся, калі ласка!
от8 февраля, 2019