Капусны хіт

КАПУСТА “ІВАНАЎСКІ ХІТ” ад Святланы  МІНЮК, старшыні Дружылавіцкага сельвыканкама Іванаўскага раёна:
– Вельмі люблю гатаваць. Для гэтага не шукаю заморскіх гародніны і садавіны, а выкарыстоўваю старадаўнія рэцэпты нашых бабуль. Вось і на “Мотальскіх прысмаках” парадавала гасцей. Асабліва ім спадабаліся мая капуста “Іванаўскі хіт” і галубцы з бульбай.
Трэба ўзяць: сярэдні качан капусты, 4 курыныя яйкі, смятану ці маянэз, па адной морквіне, цыбуліне, 2-3 памідоры.
Капусту адварваем і разбіраем качан. З яек і 8 сталовых лыжак смятаны (маянэзу) гатуем лізьён. Лісты капусты згортваем канверцікам і, памачыўшы ў лізьёне, абсмажваем на патэльні. Складаем канверцікі ў каструлю, кожны пласт паліваем запраўкай, для якой абсмажваем на алеі моркву, цыбулю, памідоры і дадаём пару лыжак смятаны або маянэзу. Даём страве некаторы час настаяцца.
На гэтай жа самай аснове можна прыгатаваць смачныя галубцы з бульбай: у адвараныя лісты капусты загарнуць бульбяное пюрэ, запраўленае абсмажанай цыбуляй, грыбамі, морквай. У фарш неабходна дадаць адно яйка. Галубцы скласці ў каструлю, заліць кожны пласт запраўкай, як для капусты “Іванаўскі хіт”, трошкі падтушыць, даць настаяцца. Гатовыя галубцы кладзём на талерку, упрыгожваем пятрушкай.
Прыемнага вам апетыту!
Калі смятану замяніць посным маянэзам  і абысціся без яйка, дык гэтыя стравы падыдуць для харчавання падчас рэлігійных пастоў.