Беларусь

Ёлка з… апельсіна


Як зберагчы жывыя дрэвы і не пакінуць свята без абавязковага атрыбута, ведаюць школьнікі Бярозаўшчыны
Вы думаеце, што ёлкі ці растуць у лесе, ці іх вырабляюць на фабрыцы? Так яно і ёсць, калі мець на ўвазе традыцыйнае дрэва. У апошні ж час усё большую папулярнасць набывае нетрадыцыйная ёлка. Яе можна зрабіць з усяго, што ляжыць пад рукой, пачынаючы з паперы і заканчваючы прадуктамі харчавання. Сакрэты такога крэатыву зусім і не сакрэты для школьнікаў нашага раёна. Ужо другі год запар у Цэнтры дадатковай адукацыі дзяцей і моладзі г. Бярозы праводзіцца выстава “Ялінка, жыві!”. Дзеці з розных школ, а таксама гурткоўцы ЦДА і ў гэты раз ахвотна прынеслі свае работы. І зрабілі яны іх  з самых нечаканых матэрыялаў: бутэлек, галінак дрэў, саломы, цукерак, гузікаў, камп’ютарных дыскаў, нітак, пер’яў і нават… апельсінаў. Цяжка ўявіць сабе ёлку з апельсінаў, але такая ёсць. Дзеці  проста парэзалі апельсіны долькамі, высушылі і ўпрыгожылі імі дрэўца. Зрабілі такую ёлку вучні Сігневіцкай школы.

На выставе адразу кідаецца ў вочы ёлка з пер’я, зробленая хлопцамі з сярэдняй школы №2 горада Бярозы. Такая далікатная, лёгкая, пушыстая, як анёл. Ёлка-самалёт таксама здзіўляе гледачоў. Яе прыдумалі і зрабілі ўдзельнікі авіямадэльнага гуртка. Вучні Бярозаўскай пачатковай школы для вырабу сваёй прыгажуні выкарысталі камп’ютарныя дыскі…
Каля 60 ялінак паказана на выставе. Кожную хочацца разгледзець і дакрануцца. І ўзнікае жаданне скарыстацца ідэямі равеснікаў і на наступныя святы паспрабаваць зрабіць нешта падобнае сабе ці каму-небудзь у падарунак.
Кацярына КАЗІНЕЦ,
клуб журналістыкі Бярозаўскага ЦДА.

Добавить комментарий

Авторизация
*
*
Генерация пароля