Сацыяльныя танцы: для таго, каб вывучыць сальсу ці бачата, узрост – не перашкода

Для таго, каб вывучыць сальсу ці бачата, узрост – не перашкода

Вы калі-небудзь марылі навучыцца хораша і ярка танцаваць? Ды так, каб ад вашага танца ва ўсіх займала дух? Думаеце, што вы на гэта не здольны? Спяшаемся вас разупэўніць: навучыцца практычна любому танцу вельмі проста. Для гэтага патрабуецца ўсяго толькі жаданне, трохі вольнага часу, вядома, выдатны настрой. Вы і дагэтуль не верыце ў свае сілы? А дарма! Менавіта такія няўпэўненыя, дзесьці сарамлівыя і не зусім падрыхтаваныя да танца людзі ўліваюцца ў новы танцавальны рух – сацыяльныя танцы. Сёлета яны прыйшлі і ў наш горад.
Сацыяльныя   танцы  – гэта танцы, для заняткаў якімі абсалютна неістотна, колькі вам гадоў, якая ў вас фігура, статус у грамадстве.  Бачата, сальса, кізомба, мерэнга, семба, зук… Кожны можа акунуцца ў дзіўны свет рухаў… Ну, а калі чалавек сустракаецца з магіяй танца,  то забывае пра паўсядзённыя праблемы шэрых будняў, бо трапляе ў атмасферу штодзённага свята.
Стваральнік групы Аляксандр Чарноў расказвае пра малады рух “Сацыяльныя танцы. Брэст”:
– Сацыяльныя танцы ёсць ва ўсім свеце, і яны карыстаюцца папулярнасцю, аднак у нашым горадзе з’явіліся нядаўна. Ідэя ў тым, каб людзі збіраліся разам і атрымлівалі асалоду ад зносін праз мову цела. Мы займаемся танцамі дзеля задавальнення. Яны не патрабуюць велізарных высілкаў. Танцаваць сацыяльныя танцы мы з сябрамі навучыліся па відэароліку, які натхніў, даў імкненне вучыцца і   ўдасканальвацца. Потым прайшлі спецыялізаваныя курсы. Жаданне вучыцца нечаму новаму і цікаваму – вось што вызначае тых, хто цяпер засвойвае сальсу, бачата, кізомба…
– У многіх склаўся стэрэатып, што яны не могуць навучыцца добра танцаваць. Але ж  кожнаму гэта пад сілу! Галоўнае – пераадолець страх і няўпэўненасць у сабе. Сацыяльныя танцы падыходзяць для любой узроставай катэгорыі. Да нас прыходзяць студэнты, працуючыя людзі. Бачыў і нямала пажылых, якія далі б фору моладзі. Так што ўзрост – не перашкода для танцаў, – упэўнены Аляксандр Уладзіміравіч.
Такое меркаванне падзяляе і Марына Самайлюк, студэнтка 5 курса філалагічнага факультэта БрДУ імя А.С. Пушкіна, якую можна назваць творчым натхняльнікам руху “Сацыяльныя танцы. Брэст”.
– Пакуль наш рух не мае афіцыйных назвы і эмблемы, але мы ўжо абвясцілі конкурс на іх у сацыяльнай сетцы “У кантакце”, – паведаміла Марына.
Ваша жыццё маркотнае і сумнае? Жадаеце яго расквеціць яркімі фарбамі? Дык  чаму ж вы марудзіце?  “Сацыяльныя танцы. Брэст” адкрыты для ўсіх жадаючых! Пазнаёміцца з новым модным кірункам можна, напрыклад, у дыскаклубе брэсцкага гарадскога парку з 19 да 22 гадзін па аўторках. Звяртайцеся да дасведчаных інструктараў, якія дапамогуць вам спасцігнуць мастацтва танца.
Наталля МЯНЯЙЛЕНКА,
Дзяніс ТРАЦЮК (фота),
студэнты БрДУ імя А.С. Пушкіна.