Беларусь

У абласным этапе ваенізаванай гульні “Зарніца” перамагла каманда з Камянца


Незвычайна пачаліся летнія канікулы для 216 юнакоў і дзяўчат, якія прынялі ўдзел у абласной “Зарніцы”. На два дні яны акунуліся ў сапраўднае армейскае жыццё.
Спаборніцтвы праходзілі на базе 38-й асобнай гвардзейскай Венскай Чырванасцяжнай мабільнай брыгады.
– Сёлетняя “Зарніца” прысвечана 70-годдзю абароны Брэсцкай крэпасці, – расказала начальнік аддзела па справах моладзі абл-выканкама Ірына Замарозная. – Удзел у ёй прынялі пераможцы раённых этапаў. Адметна, што сучасная ваенізаваная гульня захапляе і вучняў старэйшых класаў, а не толькі піянераў, як гэта было раней. “Зарніца” з кожным годам становіцца ўсё папулярней сярод моладзі.
Юнакі і дзяўчаты спаборнічалі і дэманстравалі навыкі ў конкурсах мастацкай самадзейнасці, баявых лісткоў, аглядзе строю і песні. Належным чынам праявілі сябе школьнікі ў аперацыі “Снайпер”, ваенна-спартыўнай эстафеце, паказалі добрую медыка-санітарную падрыхтоўку.
Тое, што да гульні дзеці і падлеткі старанна рыхтаваліся, сведчылі дысцыплінаванасць і знешні выгляд ігракоў. У кожнай каманды была свая непаўторная форма. Марская тэма, хакі, крапавыя берэты – дзіцячая фантазія не мела межаў. Асабліва вылучалася каманда-пераможца мінулага года з Ганцавіцкага раёна. Яна і атрымала ганаровае права адкрыць “Зарніцу-2011”.
Напружанай аказалася барацьба за перамогу. Хоць і выпалі ўсе ваенна-спартыўныя іспыты на вельмі спякотны час, 18 каманд-удзельніц годна выступілі. Не прыехалі на “Зарніцу” толькі пружанцы, а так за запаветны кубак змагаліся “зарнічнікі” з усёй Берасцейшчыны. У выніку першае месца заняла каманда сярэдняй школы №2 г. Камянца. На другім месцы – зборная Пінска, на трэцім – каманда Брэсцкага раёна.
Пераможцы атрымалі кубкі, дыпломы і падарункі ад арганізатараў. Гульня “Зарніца-2011” прайшла па ініцыятыве і пры падтрымцы аддзела па справах моладзі аблвыканкама, 38-й асобнай гвардзейскай Венскай Чырванасцяжнай мабільнай брыгады, Брэсцкага райвыканкама, абласной піянерскай арганізацыі, абласной арганізацыйнай структуры ГА “ДТСААФ”.
Акрамя насычанай конкурснай праграмы, вайскоўцы падрыхтавалі насычаную культурную. Дзеці і падлеткі ахвотна прынялі ўдзел у экскурсіі па вайсковай часці, наведалі мясцовы музей, паглядзелі тэматычныя фільмы.
Вольга СВІРЫДОВІЧ, “НТ”,
Брэсцкі раён.
Фота аўтара.

У абласным этапе ваенізаванай гульні “Зарніца” перамагла каманда з Камянца
Оцените статью

Добавить комментарий

Авторизация
*
*
Генерация пароля