Захопленасць літаратурай і тэатрам вывела ў Брэсце на сцэну паўтары сотні школьнікаў
У трэці раз у Маскоўскім раёне Брэста прайшоў фестываль школьных тэатральных калектываў “Дзве сястры: Беларусь і Расія”, у якім прынялі ўдзел 150 школьнікаў. Журы прагле-дзела 15 спектакляў. Свае сілы на сцэне паспрабавалі і малодшыя школьнікі, і старшакласнікі.
Старшыня журы, метадыст аддзела адукацыі адміністрацыі Маскоўскага раёна Святлана Смірнова вынікамі задаволена: “Асноўная мэта фестывалю – выхаванне ў дзяцей любові да літаратуры і знаёмства з тэатрам. Спалучэнне гэтых відаў творчасці вельмі цікавае. Мы рады, што ўдаецца абудзіць інтарэс школьнікаў да слова”.
Святлану Аляксееўну падтрымаў і член журы, галоўны рэжысёр Брэсцкага тэатра лялек Дзмітрый Нуянзін: “Тэатральнае мастацтва не мае межаў і ўзроставых абмежаванняў. З кожным новым фестывалем, а праходзіць ён раз у два гады, узровень удзельнікаў расце. Бывае, што дзеці губляюцца на сцэне, але заўсёды гэты фэст запальвае сапраўдныя “зорачкі”.
Напярэдадні Міжнароднага дня тэатра, які адзначаецца 27 сакавіка, у Тэатры лялек прайшло падвя-дзенне вынікаў фестывалю “Дзве сястры: Беларусь і Расія”. Узнагароды ўручылі ў 18 намінацыях. Так, за арыгінальнасць ідэі адзначылі тэатр “Вобраз” ліцэя №1 імя А.С. Пушкіна, а за паспяховы дэбют – тэатральны калектыў САШ №14.
За лепшую рэжысёрскую работу ўзнагароды адправіліся ў 12-ю і 31-ю школы, а за лепшы акцёрскі ансамбль – у 37-ю…
У межах фестывалю было праведзена шмат мерапрыемстваў. Школьнікам запомнілася творчая сустрэча з акцёрамі Тэатра лялек, прагляд і абмеркаванне спектакля “Крысалоў”. Цікавым атрымаўся і раённы конкурс чытальнікаў. А падвядзенне вынікаў фэсту завяршылася, зразумела, спектаклем: і дзеці, і дарослыя з задавальненнем паглядзелі “Русалачку” ў выкананні прафесійных брэсцкіх лялечнікаў.
Дзмітрый ШЫФЕРШТЭЙН,
студэнт БрДУ імя А.С. Пушкіна.
Сябры Мельпамены
