З 16 ПА 21 ЛІСТАПАДА Ў БРЭСЦЕ ПРОЙДУЦЬ ГАСТРОЛІ ГОМЕЛЬСКАГА ДЗЯРЖАЎНАГА ТЭАТРА ЛЯЛЕК
Гамяльчане пакажуць спектакль “Начны госць” на сцэне Брэсцкага тэатра лялек, які цяпер часова месціцца на Партызанскім праспекце, 15.
У гэты ж самы час нашы лялечнікі будуць выступаць у Гомелі, дзе іх таксама даўно чакаюць з нецярпеннем і радасцю.
Што ж уяўляе сабой “Начны госць”? Жанр спектакля пазначаны як трылер – сёння даволі модны і запатрабаваны. Але ў трактоўцы Гомельскага тэатра лялек гэта хутчэй пародыя, прычым даволі вясёлая і забаўляльная.
Аўтар п’есы – вядомы беларускі пісьменнік, лаўрэат Дзяржаўнай прэміі Беларусі Георгій Марчук, рэжысёр-пастаноўшчык – Уладзімір Матрос, мастак – Ніна Баяндзіна. Сюжэт дзеі мае лёгкую і немудрагелістую лінію. Галоўная гераіня – Мышанё Шу-Шу, якая пад ціскам злога пацука Матыльды вымушана красці прадукты. Але потым пры дзейснай дапамозе сяброў-музыкантаў – Ката, Сабакі і Папугая – Шу-Шу нарэшце вырываецца з “кіпцяў” злой Матыльды.
Такім чынам, “Начны госць” – гэта сучасная дынамічная казка з цікавай сцэнаграфіяй і музычным афармленнем. Артысты на сцэне працуюць у “жывым” плане, разам з планшэтнымі лялькамі, выкарыстоўваюць таксама элементы ценявога тэатра. У спектаклі шмат гумару, дасціпных дыялогаў, дзея разгортваецца захапляльна і імкліва. Разам з тым, кожны пачуе шчымлівыя ноткі і не застанецца абыякавым да ўсяго, што адбываецца на сцэне.
Ігар ФЕДАРОВІЧ,
г.Брэст.
Візіт “Начнога госця”
