Першымі ў рамках сёлетняга тэатральнага свята на сцэну выйшлі самі гаспадары. Брастаўчане прадэманстравалі сваю версію хрэстаматыйнай п’есы Янкі Купалы “Раскіданае гняздо” ў аднайменнай пастаноўцы Уладзіміра Савіцкага.
Кранальны і надзвычай пранізлівы спектакль гарманічна ўпісаўся ў фестывальную афішу. Былы “купалавец” Уладзімір Канстанцінавіч не надта адышоў ад канонаў класічнасці. У той жа час драма “Раскіданае гняздо” атрымалася вельмі сучаснай па сваёй праблематыцы. Тэма любові і кахання, дзякуючы арыгінальнай акцёрскай падачы, касцюмам, лірычным мелодыям ад трыа “Троіца”, набыла тут амаль што глабальны падтэкст.
Можна смела рэзюмаваць: творчы тандэм Уладзіміра Савіцкага і Брэсцкага акадэмічнага тэатра драмы папоўніў тэатральную спадчыну яшчэ адной добрай інсцэніроўкай.
Дарэчы, закранаючы пытанні арганізацыйныя: білеты на гэты беларускамоўны спектакль разляталіся з хуткасцю ветра. Па нейкай няпісанай традыцыі пачатак і завяршэнне фестывалю карыстаюцца асаблівай папулярнасцю. Адным з самых “смачных” момантаў сёлетняга форуму па версіі сапраўдных тэатральных гурманаў будзе менавіта закрыццё. Развітальным акордам брэсцкага фэсту стане камедыя “Вяселле Бальзамінава” трыумфатараў “Белай вежы-2010” пермскага тэатра “Ля моста”. Небывалы ажыятаж вакол гэтага спектакля падмацаваны ўражаннямі ад іх леташняй пастаноўкі “Калека з Інішмана”. Арганізатарам нават прыйшлося запланаваць дадатковы паказ камедыі, каб задаволіць інтарэс публікі. Ён адбудзецца 17 верасня ў 18.00.
Ні позняя ў параўнанні з мінулым годам рэалізацыя білетаў, ні эканамічны крызіс не перашкодзілі прыхільнікам Мельпамены зноў адчуць прыемную фестывальную мітусню. Брастаўчане аператыўна “размялі” білеты і на самы дарагі спектакль гэтай восені “Мірандаліна” маскоўскага тэатра “Ля Нікіцкіх варот” коштам ад 70 тысяч рублёў. А што да танных забаў, якімі па праве лічацца вулічныя спектаклі, дык у іх таксама не будзе дэфіцыту.
Увогуле, з 9 па 16 верасня сведкамі фестывальных феерый стануць дзесьці 15 тысяч чалавек. Таксама арганізаваны выязныя паказы за межамі абласнога цэнтра – у Кобрыне і Івацэвічах. Ну, а гасцінныя гаспадары чакаюць ад мерапрыемства, як заўжды, сапраўднага свята з усімі яго атрыбутамі: гучнымі апладысментамі, шчырымі эмоцыямі, крэатыўнымі эксперыментамі, даследаваннямі, яркімі асобамі. Вельмі сімвалічна, што фестывальная афіша сёлета прысвечана тэме кахання. Менавіта гэтае пачуццё арганізатары заўжды прагнуць раздзяліць з гледачамі. І шчыра спадзяюцца, што яно абавязкова будзе ўзаемным. Па добрай традыцыі…
Ніна ЛЕАНАВЕЦ, “НТ”.
Заўтра ўвечары падвядуць вынікі XVI Міжнароднага тэатральнага фестывалю “Белая вежа-2011. Час кахаць!”
