Беларусь

28 гадоў кравец прадстаўляе інтарэсы сваіх выбаршчыкаў


Нетыповую для мужчыны прафесію Іван Майсюк, старшы майстар участка давыд-гарадоцкага Дома быту, атрымаў у спадчыну ад бацькі – той таксама быў краўцом. Хлопчык з дзяцінства пасябраваў з іголкай і ніткай. Ды абставіны склаліся так, што неабходнасць ператварыла цікавае хобі ў любімую прафесію.
Ужо амаль 50 гадоў працуе Іван Іванавіч у сферы паслуг. Мясцовым жыхарам падабаецца вясёлы нораў бытавіка, яго бяскрыўдныя жарты і жаданне ў любую хвіліну прыйсці на дапамогу. Таму зноў і зноў давяраюць яму гараджане прадстаўляць іх інтарэсы ў гарадскім Савеце дэпутатаў. З 1982 года ён годна пацвярджае свой дэпутацкі статус.
Іван Іванавіч, як ніхто іншы, разумее: раз людзі абралі дэпутатам – значыць, ёсць патрэба ў яго дапамозе. Таму і адказнасць павінна быць удвая большай. Да Івана Майсюка нярэдка прыходзяць за парадай людзі і з іншых выбарчых акруг – ён аднолькава ахвотна дапамагае ў вырашэнні праблем усім гараджанам. Галоўнае – павышаць якасць жыцця для сваіх землякоў.
Добрая слава ідзе пра майстра: нікому не адмаўляе, заўсёды дасць слушную параду. А калі сам не можа дапамагчы – накіруе да патрэбных спецыялістаў.
Родныя ўжо даўно змірыліся з такім актыўным ладам жыцця Івана Іванавіча. Гэты ўсмешлівы сівавалосы мужчына з іскрынкамі ў вачах нават адпачывае вельмі рэдка – выхадныя дні таксама праводзіць у справах. Адзіным выхаваўчым метадам, які прызнаваў і практыкаваў усё жыццё, была людскасць.
Ніна ЛЕАНАВЕЦ, “НТ”,
г. Давыд-Гарадок

28 гадоў кравец прадстаўляе інтарэсы сваіх выбаршчыкаў
Оцените статью

Добавить комментарий

Авторизация
*
*
Генерация пароля