Беларусь

Галоўная задача – забяспечыць якасць кармоў


Калі будзе такі падыход да любой справы, якую робім,дасягнём многага, лічыць кіраўнік вобласці Канстанцін Сумар.
Чарговае пасяджэнне аблвыканкама адбылося 17 мая ў Івацэвіцкім раёне. Перад тым, як прыступіць да абмеркавання пытанняў парадку дня, удзельнікі выязнога пасяджэння наведалі ў райцэнтры кукурузакалібровачны завод магутнасцю 10 тысяч тон насення ў год і сельскагаспадарчае прадпрыемства “Перамога”. На прыкладзе адной з буйнейшых гаспадарак раёна было паказана: на ласку божую і міласць надвор’я спадзявацца не варта – нават у самых складаных кліматычных умовах трэба займацца нарыхтоўкай кармоў.
З дапамогай тэхнікі мы навучыліся забя-спечваць сябе патрэбнай колькасцю кармоў, – заўважыў старшыня аблвыканкама Канстанцін Сумар. – А зараз самая галоўная задача – іх якасць. У гэтым плане сёлетні год павінен стаць пераломным для кожнай гаспадаркі. Пара зразумець: будуць якасныя кармы – з’явяцца дадатковыя 15-20 працэнтаў жывёлагадоўчай прадукцыі. А больш атрымаем мяса, малака – зможам паспяхова канкурыраваць з імі за межамі краіны. Калі любую справу, якую робім, будзем выконваць якасна, сумленна і своечасова – дасягнём многага.
Перад тым, як даць слова старшыні аблсельгасхарчу Сцяпану Радкаўцу – дакладчыку па пытаннях “Аб ходзе выканання рашэння Брэсцкага аблвыканкама ад 20 ліпеня 2009 года “Аб ходзе рэалізацыі мерапрыемстваў па развіцці жывёлагадоўчай галіны Брэсцкай вобласці на 2008-2010 гады, зацверджаных рашэннем ад 18 лютага 2008 года №111 “Аб стане работы па далейшым развіцці галіны жывёлагадоўлі (на прыкладзе Пінскага і Столінскага раёнаў) і задачах вобласці ў гэтай галіне на 2008-2010 гады” і “Аб рабоце Брэсцкага, Жабінкаўскага, Іванаўскага райвыканкамаў па выкананні прагнозных паказчыкаў на прыкладзе асобных сельскагаспадарчых арганізацый” – Канстанцін Сумар нацэліў кіраўнікоў рэгіёнаў на зладжаную работу па стварэнні кармавой базы: “Ніякай раскачкі!” Наконт пытанняў, вынесеных для абмеркавання, упэўнена зазначыў: “Калі станем канкрэтна працаваць з кожнай гаспадаркай – вынік будзе відавочна лепшым”. Гаворачы пра Брэсцкі раён – адзін з мацнейшых у вобласці, тым не менш, на думку Канстанціна Андрэевіча, бачыш шмат праблем, калі глядзець на яго работу ў разрэзе асобна ўзятых гаспадарак. Тое ж самае назіраецца і ў дачыненні Жабінкаўскага, Іванаўскага раёнаў.
“Крыўдна, – сказаў губернатар, – калі губляем на пустым месцы”. Ён нагадаў, як іншым разам дазваляем перарастаць пашам, як трымаем жывёлу ў брудзе і гноі, а гэта ж, несумненна, уплывае на канчатковы вынік. Трэба вызначыцца і зразумець, чаму складваецца такая сітуацыя, і мяняць сістэму работы.
Сцяпан Радкавец канстатаваў, што ў апошнія гады працягваецца рост вытворчасці жывёлагадоўчай прадукцыі ў сельгасарганізацыях вобласці. У той жа час даведзеныя заданні на 2009 год па валавай вытворчасці малака выканалі толькі Брэсцкі і Маларыцкі раёны. Калі летась сярэдні надой малака на карову склаў 4785 кілаграмаў, дык у васьмі гаспадарках Брэстчыны (у Баранавіцкім і Ганцавіцкім раёнах – па тры, у Івацэвіцкім і Пружанскім – па адной) надаілі менш за 3 тысячы. Па меркаванні Сцяпана Рыгоравіча, стрымліваючым фактарам павелічэння вытворчасці прадукцыі жывёлагадоўлі і павышэння прадукцыйнасці жывёлы застаецца нізкая якасць кармоў.
Сёлета за прайшоўшыя чатыры месяцы вытворчасць малака да аналагічнага мінулагодняга перыяду павялічылася ўсяго на 7,8 працэнта. У Іванаўскім раёне – яшчэ менш, на 3 працэнты, Маларыцкім – 3,4, Камянецкім – 4,6, Брэсцкім – 5 працэнтаў. Неапраўдана нізкія тэмпы росту вытворчасці малака – ад 5 да 7 працэнтаў – у Бярозаўскім, Жабінкаўскім, Ляхавіцкім, Кобрынскім і Столінскім раёнах. Па словах выступоўцы, з пачатку года па вобласці атрымана малака класа “Экстра” 17,9 тысячы тон ці 6 працэнтаў ад усяго рэалізаванага на перапрацоўку. У Жабінкаўскім раёне такога малака наогул не выраблена…
Дэталёва, на яскравых прыкладах была прааналізавана работа Брэсцкага, Жабінкаўскага і Іванаўскага райвыканкамаў па выкананні прагнозных паказчыкаў сельскагаспадарчымі арганізацыямі. Здаецца, ёсць усё неабходнае для паспяховай работы – кадры, тэхніка, угнаенні. Дык у чым справа? Магчыма, у недахопе кантролю і попыту за зробленае?
– Мы і далей будзем разглядаць, наколькі кіраўнік рэгіёна ўпраўляе працэсам, – падагульняючы размову па двух пытаннях, сказаў Канстанцін Сумар, – як у раёнах працуюць з гаспадаркамі, якія не забяспечваюць выкананне прагнозных паказчыкаў. А іх дзейнасць можа быць больш плённай!..
А
б рабоце гаррайвы-канкамаў, устаноў і службаў па рэалізацыі Дэкрэта Прэзідэнта Рэспублікі Беларусь ад 24 лістапада 2006 года №18 “Аб дадатковых мерах па дзяржаўнай ахове дзяцей у неспрыяльных сем’ях” і прафілактыцы сямейнай нядбайнасці праінфармаваў начальнік упраўлення адукацыі аблвыканкама Міхаіл Ціханчук. Паслухаўшы дакладчыка, не прыходзіцца сумнявацца ў маштабнасці прынятых мер па павышэнні адказнасці бацькоў за выхаванне дзяцей і дзяржаўнай абароне іх інтарэсаў. Летась толькі на пасяджэннях аблвыканкама тройчы разглядаліся пытанні рэалізацыі Дэкрэта №18. З асобамі, якія абавязаны кампенсаваць расходы за ўтрыманне дзяцей, што знаходзяцца на дзяржаўным забеспячэнні, праводзіцца не проста вялікая, а індывідуальная работа. Упраўленне ўнутраных спраў аблвыканкама сумесна з камітэтам па працы, занятасці і сацыяльнай абароне распрацавалі комплекс мер па недапушчальнасці прагулаў нядбайнымі бацькамі.
Да лепшага змянілася сітуацыя з наймальнікамі па вылучэнні вакансій абавязаным асобам, для працаўладкавання якіх рашэннем аблвыканкама вызначана 1041 прадпрыемства. Калі ў 2008 годзе служба занятасці працаўладкавала 90 чалавек, дык летась – 393, а ў першым квартале сёлета – 213 чалавек.
Міхаіл Андрэевіч адзначыў, што “прафілактыка сацыяльнага сіроцтва, абарона правоў і законных інтарэсаў непаўналетніх дае свае вынікі: павялічылася колькасць асоб, адноўленых у бацькоўскіх правах, і вырасла колькасць дзяцей, якія з дзіцячых сацыяльных прытулкаў вярнуліся ў біялагічныя сем’і”.
Што датычыць спагнання сродкаў з нядбайных бацькоў на ўтрыманне іх дзяцей, дык гэтая работа становіцца ўсё больш выніковай. За мінулы год лічба спагнання дасягнула 48,4 працэнта, а ў першым квартале сёлетняга – 52,1. Міхаіл Ціханчук назваў рэгіёны – Ганцавіцкі, Пружанскі і Столінскі, дзе з пачатку года пакуль што нізкім застаецца працэнт звароту сродкаў. Ніжэй абласнога ўзроўню гэты паказчык і ў Баранавіцкім раёне, Брэсцкім, Жабінкаўскім, Іванаўскім, Івацэвіцкім, Лунінецкім, Пінскім, а таксама ў Маскоўскім раёне г.Брэста і горадзе Пінску. Прынятыя меры дазволілі амаль удвая павялічыць працэнт пакрыцця ў Камянецкім і Ляхавіцкім раёнах. Высокі паказчык здолелі захаваць у Ленінскім раёне Брэста і Баранавічах. А ў Бярозаўскім і Драгічынскім раёнах працэнт спагнання сродкаў з абавязаных асоб нават перавысіў сярэднеабласны.
Так, лічбы гавораць пра многае. Але на пасяджэнні пільная ўвага была скіравана на тое, што рабіць далей, каб нешчаслівых дзяцей з кожным годам было ў грамадстве менш, каб нядбайныя бацькі станавіліся на шлях выпраўлення, як прымусіць іх працаваць і ўтрымліваць сваіх дзяцей. “Разуменне актуальнасці гэтага пытання дазволіць актыўней працаваць над выкананнем прэзідэнцкага Дэкрэта”, – лічыць начальнік абласнога ўпраўлення ўнутраных спраў Уладзімір Сычэўскі. А кіраўнік вобласці Канстанцін Сумар перакананы: калі штодзень працаваць з гэтым няпростым кантынгентам, калі нядбайныя бацькі зразумеюць, што ў іх няма іншага выйсця, як зарабляць грошы на сваіх дзяцей – справы
наладзяцца.
Галіна МАЗІНА, “НТ”,
Івацэвіцкі раён

Галоўная задача – забяспечыць якасць кармоў
Оцените статью

Добавить комментарий

Авторизация
*
*
Генерация пароля