Беларусь

Работнікі прафсаюза Брэсцкай і Закарпацкай абласцей падпісалі дагавор аб супрацоўніцтве


Сяброўства паміж суполкамі пачалося ў 2008 годзе з падпісання першага дагавора аб супрацоўніцтве, разлічанага на два гады. За гэты час наладжаны цесныя сувязі не толькі па прафсаюзнай лініі, але і з украінскімі фальклорнымі калектывамі, музеямі і бібліятэкамі. Народны ансамбль “Іршанская родына” з Закарпацця запомніўся брэсцкім аматарам фальклору рытмічнымі гуцульскімі матывамі. Нашу беларускую культуру праз цудоўныя музычныя кампазіцыі да ўкраінскіх слухачоў данеслі “Астрамечаўскія Лявоны” з Брэсцкага раёна. І беларускія, і ўкраінскія артысты актыўна ўдзельнічаюць у сумесных фестывалях народнай творчасці і рамёстваў.
Нядаўна пачалося супрацоўніцтва паміж Брэсцкім абласным краязнаўчым музеем і Закарпацкім музеем народнай архітэктуры і быту.
– Наша вобласць супра-цоўнічае з суседнімі краінамі Еўрасаюза, але пакуль не атрымліваецца дайсці да такога ўзроўню адносін, калі калегі становяцца сябрамі, – зазначыла Наталля Товцін, старшыня абласнога камітэта прафсаюза работнікаў культуры Закарпацкай вобласці. – З Брэстчынай нас аб’ядноўвае падабенства менталітэтаў і тое, што ў сваіх краінах мы з’яўляемся самымі заходнімі рэгіёнамі з падобнай прыгранічнай інфраструктурай. Шмат агульнага ў нашых людзей, у культуры, быце і нават сацыяльна-эканамічнай сферы, таму вельмі хутка паразумеліся.
Значны крок наперад зроблены ў сферы турызму. Для берасцейцаў больш даступнымі сталі 7 санаторыяў Закарпацця, якія круглы год гатовыя прыняць турыстаў. Карыстаюцца папулярнасцю экскурсійныя туры ў Мукачава і Ужгарад. Украінцы з задавальненнем наведваюць мемарыяльны комплекс “Брэсцкая крэпасць-герой”, нацыяльны парк “Белавежская пушча”, музеі, выставачныя цэнтры горада над Бугам, а таксама цікавяцца будаўніцтвам аграгарадкоў і агратурызмам.
– Надзейны саюз паміж рэгіёнамі быў створаны два гады таму, а цяпер мы ўдасканальваем дагавор аб супрацоўніцтве з надзеяй на доўгатэрміновае сяброўства з блізкімі нам па духу людзьмі, – падкрэсліла старшыня Брэсцкага абласнога камітэта прафсаюза работнікаў культуры Галіна Крынец. – Паміж абласцямі запланавана весці работу па стварэнні максімальна спрыяльных умоў для развіцця культурнага турызму, абменьвацца дэлегацыямі, праводзіць вучобу і канферэнцыі.
Дарэчы, ініцыятарам і ідэйным натхняльнікам развіцця сувязей з Закарпаццем была менавіта Галіна Крынец. Падчас адной экскурсійнай паездкі ва Украіну з’явілася задумка аб сяброўстве. Ідэя вельмі спадабалася ўкраінцам. Партнёрскія сустрэчы сталі ўжо традыцыйнымі, з кожным разам з’яўляецца больш агульных інтарэсаў і перспектыўных планаў. Наталля Товцін разам з прафсаюзным актывам прыязджала ў Брэст на справаздачна-выбарчую канферэнцыю абкама прафсаюза работнікаў культуры, была ў Мінску на з’ездзе.
Падчас цяперашняга двухдзённага візіту ўкраінскія партнёры пабывалі ў Брэсце, Брэсцкім раёне, Камянцы і Кобрыне. З калегамі яны абмяняліся вопытам па ахове працы, стварэнні новых працоўных месцаў у малых гарадах і пераходзе на кантрактную сістэму работы.
Як адзначыў намеснік старшыні абласнога аб’яднання прафсаюзаў Вячаслаў Салавей, у Беларусі і Украіны многа падабенства не толькі ў рабоце прафсаюзных арганізацый, але і ў развіцці краін у цэлым. Гэта зусім не перашкаджае адкрываць для сябе суседзяў па-новаму. Асабліва ўразіла ўкраінцаў велізарная падтрымка дзяржавай устаноў культуры і іх папулярнасць сярод насельніцтва.
Звярнулі ўвагу госці на прыгожыя і дагледжаныя палі, бо для жыхароў горнага краю беларускія раўніны – экзотыка. Па словах старшыні абкама прафсаюза работнікаў аўтатранспарту Закарпацця Аляксандра Вароніна, больш за ўсё запомніцца іх дэлегацыі гасціннасць і дабрыня берасцейцаў. А тое, што Брэстчыну ўкраінскія прафсаюзныя лідары пакідалі натхнёныя ідэяй яднання і сумеснымі планамі на будучыню – дакладная прыкмета дасканалых адносін, якія і павінны быць паміж надзейнымі сябрамі.
Вольга СВІРЫДОВІЧ, “НТ”

Добавить комментарий

Авторизация
*
*
Генерация пароля