Не быць абыякавымі – тады праблемы грамадзян стануць вырашальнымі.
Да такой высновы прыйшлі ўдзельнікі семінара-нарады па пытанні “Аб мерах па далейшым павышэнні якасці жыцця насельніцтва, якія прымаюцца органамі мясцовага кіравання і самакіравання ў 2010 годзе, аб’яўленым Прэзідэнтам Рэспублікі Беларусь Годам якасці”, які адбыўся ў чацвер на базе Брэсцкага, Драгічынскага і Іванаўскага раёнаў.
Падчас практычнай часткі мерапрыемства старшыні сельскіх, пасялковых і раённых Саветаў дэпутатаў, старшыні райвыканкамаў, старасты населеных пунктаў, кіраўнікі абласных службаў на прыкладзе работы асобных сельскіх Саветаў паглядзелі, як органамі мясцовага кіравання і самакіравання забяспечваецца павышэнне якасці жыцця насельніцтва. Убачылі, як гавораць, усё лепшае, што зроблена ў гэтым кірунку. Прапанаванае ўвазе ўдзельнікаў семінара-нарады не новае, але важнае, зазначыў, адкрываючы пленарнае пасяджэнне, якое адбылося ў Драгічынскім Доме культуры, старшыня аблвыканкама Канстанцін Сумар. Бо ад таго, у якім стане знаходзяцца нашы населеныя пункты, залежыць настрой людзей. А гэта, у першую чаргу, добраўпарадкаванне вёсак і вёсачак, стан дарог і вуліц, утрыманне могілак і міні-палігонаў, дапамога сялянам у вядзенні асабістых падсобных гаспадарак. Усе гэтыя пытанні павінны паўсядзённа знаходзіцца ў полі зроку старшынь сельскіх і пасялковых Саветаў дэпутатаў. Як гаспадар адносіцца да свайго дома, так кіраўнікі мясцовай улады павінны адносіцца да сваіх населеных пунктаў. Галоўная іх задача – арганізаваць людзей на добраўпарадкаванне сваіх двароў і вуліц, на якіх яны пражываюць. І гэтая работа павінна весціся пастаянна, а не ад выпадку да выпадку, у мерапрыемствах, якія прымаюцца, абавязкова ўказваць канкрэтныя тэрміны іх выканання.
У выступленні кіраўніка вобласці былі агучаны раёны, у якіх адсутнічае сістэма работы ў навядзенні парадку на могілках: Ляхавіцкі, Столінскі, Драгічынскі, Іванаўскі, Івацэвіцкі. Што тычыцца міні-палігонаў для адходаў, дык яны таксама ў многіх месцах утрымліваюцца з парушэннямі, на іх адсутнічаюць штатныя работнікі.
Не пакінуў па-за ўвагай Канстанцін Андрэевіч і такое пытанне, як дапамога вяскоўцам у вядзенні асабістых падсобных гаспадарак з боку сельгаспрадпрыемстваў. Пра тое, што не ўсе кіраўнікі гаспадарак з разуменнем ставяцца да клопатаў вяскоўцаў, некаторыя выдзяляюць работнікам неапрацаваныя соткі, непрацуючым і пенсіянерам – сена па астаткавым прынцыпе, – гавораць іх звароты ў вышэйстаячыя органы. Такія факты, на думку старшыні аблвыканкама, ніяк не ўпрыгожваюць ні кіраўнікоў сельгаспрадпрыемстваў, ні старшынь сельскіх Саветаў. І інакш, як абыякавасцю да праблем людзей, іх назваць нельга. Пра абыякавасць з боку адказных асоб у вырашэнні патрэб людзей гаварылі на нарадзе і выступаючыя. А яе ў рабоце кіраўнікоў мясцовай улады не павінна быць. Бо абыякавасць, як вядома, бясплодная…
Надзея ЯЦУРА, “НТ”,
г. Драгічын
Вяскоўцам дапамогуць у вядзенні асабістых гаспадарак
