Беларусь

Якое малако выбраць?


Размову на гэтую тэму “НТ” пачала артыкулам “Прадуктовая ліхаманка…” (№8 за 17 лютага с. г.). Яго аўтар Надзея Кляўчэня прапанавала даць слова брэсцкім медыкам, каб пачуць кампетэнтнае меркаванне наконт карысці і шкоды малочных прадуктаў для розных узроставых катэгорый насельніцтва
Валянціна МАШЭНСКАЯ, урач-валеолаг абласнога цэнтра гігіены, эпідэміялогіі і грамадскага здароўя:

– Малако – самы збалансаваны па складзе харчовы прадукт. Паўлітра малака – гэта больш за палову сутачнай патрэбы чалавека ў жывёльным бялку і больш чым 10-я частка сутачнай патрэбы ў энергіі. Да таго ж, малако – галоўны пастаўшчык кальцыю і фосфару, прычым суадносіны іх блізкія да аптымальных, што важна для засваення прадукту. Ёсць у ім калій, жалеза, вітаміны розных груп, фоліевая кіслата і інш.
Актуальным зараз з’яўляецца пытанне: тлустае ці нятлустае малако купляць? Больш карысныя малако і кісламалочныя прадукты нармальнай тлустасці (3,5%, тварог 9%). І вось чаму.
Па-першае, у такіх прадуктах утрымліваецца неабходная колькасць вітаміну Д, які патрэбны для засваення кальцыю. Чым ніжэй тлустасць таго ж малака, тым менш вітаміну Д – а значыць, горш будзе засвойвацца кальцый.
Па-другое, у малацэ 3,5% тлустасці ?-караціну ў 2 разы і вітаміну А ў 1,5 раза больш, чым у малацэ тлустасцю 3,2%. У нятлустым малацэ гэтых вітамінаў амаль няма.
Па-трэцяе, у склад малочнага тлушчу ўваходзіць лецыцін (фасфаліпід), які з’яўляецца кампанентам абалонкі клетак, рэгулюе тлушчавы абмен, змагаецца са свабоднымі радыкаламі. Чым ніжэй тлустасць прадукту, тым менш у ім гэтага карыснага тлушчу. Так, у 9-працэнтным тварагу яго ўтрымліваецца ў 17 разоў больш, чым у нятлустым. Крыніц жа атрымання гэтых тлушчаў нямнога: малочныя прадукты нармальнай тлустасці, вяршкі, смятана, жаўток яйка, нерафінаваныя алеі, некаторыя раслінныя прадукты. А вось у сметанковым масле такіх карысных тлушчаў няма, таму яго колькасць варта абмежаваць, а лепш увогуле адмовіцца ад намазвання на хлеб.
Узроставыя асаблівасці спажывання малочных прадуктаў усё ж ёсць. Напрыклад, немаўлятам каровіна малако непажадана піць, дзеткам да 3-х год можна на ім гатаваць кашкі, а з кісламалочных прадуктаў падыдзе ражанка. Дзецям старэйшага ўзросту карысныя любыя малочныя прадукты, вось толькі калі ёсць схільнасць да алергічных працэсаў, дык выкарыстоўвайце выключна сухое малако.

Алена ЛЯЎКОВІЧ, урач-герыятр паліклінікі №1 г. Брэста:

–– Здароўе нельга ўтрымаць лекамі, яны – для лячэння хвароб. А вось адзін з важных кампанентаў здароўя – правільнае харчаванне. Трэба ўлічваць, што ў старасці яго тып і аб’ёмы змяняюцца. З узростам на 10-15 працэнтаў зніжаецца інтэнсіўнасць абменных працэсаў у арганізме, змяншаецца здольнасць органаў да пераварвання, засваення і атрымання пажыўных рэчываў. Таму асноўнае правіла харчавання для людзей пажылога ўзросту заключаецца ва ўмеранасці харчовага рацыёну. Так, порцыя другой стравы, калі вам за 60, павінна быць на трэць меншай, чым у маладога. Меркаванне, што малако ідэальна падыходзіць пажылым людзям, памылковае. Лепш аддаць перавагу кісламалочным прадуктам, таму што лішак жывёльных тлушчаў з гадамі правакуе атэрасклероз.
З узростам у некаторых людзей перастае працаваць фермент, які расшчапляе малочны цукар, і арганізм перастае пераносіць малако, узнікаюць непрыемныя адчуванні, пазбавіцца ад якіх дапамогуць кісламалочныя прадукты. Пры хваробах страўнікава-кішэчнага тракту малако проціпаказана, а піць можна кефір, але ў невялікай колькасці. Рэкамендую кашы на вадзе, болей буракоў, морквы, яблык, менш бульбы. Параіцца з урачом наконт асаблівасцей сваёй дыеты з улікам узросту, медыцынскіх паказанняў усё ж лепш індывідуальна.
Кожны чалавек пры жаданні, зыходзячы са сваіх магчымасцей, можа забяспечыць сабе пэўную якасць жыцця, але трэба пастаянна клапаціцца пра сябе і сваё здароўе. Што да малочнага буму, які мы назіраем у апошні час, дык, мяркую, сітуацыя стабілізуецца. Можа, і тут варта прымяніць прынцып адраснасці, каб, напрыклад, малазабяспечаныя людзі, шматдзетныя сем’і маглі набываць малочныя прадукты па сацыяльных цэнах. Гэтае ж права можна замацаваць і за сацыяльнымі работнікамі, якія купляюць прадукты для абслугоўваемых дома старых людзей. Тут павінна быць сумесная работа вытворцаў, гандлю, сацыяльнай службы.
Запісала Лідзія КУРБАТ, “НТ”.

Якое малако выбраць?
Оцените статью

Добавить комментарий

Авторизация
*
*
Генерация пароля