Выбар, які падтрымалі

Падведзены вынікі абласнога “Фестывалю здароўя”
Як на практыцы фарміруецца здаровы лад жыцця? Наколькі эфектыўныя інфармацыйна-адукацыйныя тэхналогіі ў гэтай сферы? З такіх вось пытанняў, уласна кажучы, і пачынаўся абласны “Фестываль здароўя”. Прыдуманы ў нашым рэгіёне некалькі год таму, ён прыжыўся на Брэстчыне. І хоць гэты фестываль – бадай што самае працяглае ў часе мерапрыемства (акцыя доўжыцца год, і толькі потым рэзюмуюцца яе вынікі), ад яго ніхто не стамляецца.
Арганізатары “Фестывалю здароўя” – упраўленні аховы здароўя і адукацыі аблвыканкама, абласное аб’яднанне прафсаюзаў і Прадстаўніцтва Нацыянальнага алімпійскага камітэта Рэспублікі Беларусь у Брэсцкай вобласці, абласны цэнтр гігіены, эпідэміялогіі і грамадскага здароўя – на чарговым падвядзенні вынікаў гэтага незвычайнага фэсту адзначылі актыўнасць моладзі, зацікаўленасць прафсаюзных арганізацый і ўстаноў аховы здароўя. У фінальнай частцы агляду ўдзельнічала амаль 90 калектываў устаноў і арганізацый Берасцейшчыны. Журы ацаніла, як знізіўся ўзровень захворванняў, дзе эфектыўней аказалася прафілактыка і інфармацыйна-адукацыйная работа, у каго лепшымі атрымаліся спартыўна-фізкультурныя і аздараўленчыя мерапрыемствы, якія ўмовы створаны для вучобы, працы, адпачынку з улікам забеспячэння выканання прынцыпаў здаровага ладу жыцця.
Пераможцамі сталі: сярод устаноў прафтэхадукацыі – Брэсцкі дзяржаўны прафесіянальны ліцэй будаўнікоў, сярод агульнаадукацыйных устаноў – сярэдняя школа №9 г. Кобрына. Яна ж перамагла ў намінацыі “Лепшы клуб “Юны алімпіец”. Сярод устаноў аховы здароўя ў кірунку фарміравання здаровага ладу жыцця вылучыўся Пінскі занальны цэнтр гігіены і эпідэміялогіі, а лепшай прафсаюзнай арганізацыяй у гэтай справе прызнана суполка СВК “Астрамечава” Брэсцкага раёна. На гэты раз пераможцы сярод калектываў прадпрыемстваў (сельгасарганізацый) журы не вызначыла, але ж двух прызёраў назвала: КУШВП ЖКГ “Драгічынская ЖКГ” (2-е месца) і Баранавіцкі занальны цэнтр гігіены і эпідэміялогіі (3-е месца). Усяго ж 16 пераможцаў і прызёраў атрымалі дыпломы і падарункі, а яшчэ 7 калектываў журы адзначыла заахвочвальнымі прызамі.
Лідзія КУРБАТ, “НТ”.