Зіма і лета… круглы год

Дзеці і дарослыя ў Івацэвічах захапіліся хакеем і катаннем на каньках, а хутка пачнуць асвойваць водныя віды спорту

У рэшце рэшт зіма парадавала нас снегам і мінусам на тэрмометры. Аднак кліматычныя метамарфозы падштурхоўваюць задумацца аб тым, што гэта не надоўга. Пакуль людзі старэйшага ўзросту ўспамінаюць ранейшыя завірухі, гурбы ў чалавечы рост, неверагодныя маразы і забавы на рачным лёдзе, сучасная моладзь і дзеці прызвычайваюцца да новых умоў. Адчуць дух зімы і пабываць у лядовай казцы сёння рэальна для многіх жыхароў Брэстчыны.
Дзесяць год таму першая ў рэгіёне  Лядовая арэна з’явілася ў Брэсце. Затым  крытыя лядовыя збудаванні прынялі наведвальнікаў у Баранавічах, Бярозе, Кобрыне, Пінску, Пружанах, Лунінцы. Восьмым горадам у гэтым спісе сталі Івацэвічы.
У лістападзе 2011 года пачаў работу Лядовы палац у Заходнім мікрараёне Івацэвіч. На новым спартыўным аб’екце абсталяваны раздзявальні, душавыя, кабінеты для персаналу, тэхнічныя памяшканні, буфет. Трыбуны ўмяшчаюць 790 месцаў. Разам з новай спартыўнай пляцоўкай у райцэнтры з’явілася збудаванне для правядзення канцэртна-відовішчных мерапрыемстваў. Івацэвіцкая Лядовая арэна з’яўляецца сястрой-блізняткай пружанскай. Яна пабудавана па такім жа праекце.
Вядома ж, з адкрыццём арэны тут павінна з’явіцца хакейная каманда. Ужо набраны шэсць груп будучых зорак вялікага спорту. 60 юнакоў трэніруюцца ў дзіцяча-юнацкай спартыўнай школе. У будучым, акрамя хакея, плануецца развіваць і фігурнае катанне. Але для гэтага неабходна не проста запрасіць трэнераў на работу, але і стварыць дастойныя ўмовы для іх жыцця. Як гаворыцца, не ўсё адразу.
–  Лядовы палац – доўгачаканы аб’ект у Івацэвічах, – зазначыў дырэктар дзіцяча-юнацкай спартыўнай школы Юрый Бурвін. – З першых дзён няма адбою ад наведвальнікаў. Прычым на масавае катанне прыходзяць і моладзь, і дзеці, і тыя, каму за… Бавіць час у Лядовым не толькі карысна і цікава, але і даступна. Цэны сімвалічныя.
Усе, з кім даводзілася сустракацца, ахвотна дзяліліся ўражаннямі ад  наведвання Лядовага. Аказалася, што і ў горадзе, і ў раёне шмат прыхільнікаў зімовых відаў спорту, якімі займаюцца нават цэлыя сем’і.
А ў тым, што такі аб’ект, сапраўды, неабходны на Івацэвіччыне, самыя ўпартыя скептыкі могуць пераканацца, прыйшоўшы сюды. Паверце: лёд не прастойвае, а падчас масавага катання яблыку няма дзе ўпасці.
Прыходзяць сюды і проста паглядзець на лядовае шоу. Нядаўна аншлаг быў на таварыскім матчы мясцовых аматараў спорту мужных і каманды Слоніма. Гаспадары выйгралі, і гэта было вялікім святам для гараджан. Па словах Юрыя Бурвіна, ёсць задумка праводзіць у Івацэвічах спаборніцтвы для аматарскіх каманд з суседніх раёнаў. Такі Калядны турнір стане паслядоўнікам аналагічнага мерапрыемства, што арганізаваў Прэзідэнцкі спартыўны клуб.
А вось утаймаваць водную стыхію змогуць у Івацэвічах пасля адкрыцця плавальнага басейна. Дзве чашы (адна – для заняткаў плаваннем, другая – для масавага наведвання) размясціліся ў сучасным будынку. Басейн пабудаваны па тым жа праекце, што і комплекс у Тамашоўцы Брэсцкага раёна, а гэты спарткомплекс вядомы сваімі магчымасцямі не толькі на Брэстчыне.
У спартыўную школу на плаванне ўжо запісаліся больш за сто дзяцей. На думку адміністрацыі, плаванне будзе таксама папулярным, як і наведванне Лядовага палаца. Створаны спартыўны комплекс разлічаны на развіццё масавага спорту і заняткі фізічнай культурай, а гэта значыць – на аздараўленне нацыі. Хіба не самая ўдалая інвестыцыя?
Афіцыйнае адкрыццё івацэвіцкіх спартыўных аб’ектаў запланавана правесці на наступным тыдні, аднак ужо цяпер зразумела, што яны неабходныя людзям. Побач разрастаецца будаўніцтва жылля і развіваецца інфраструктура.
Застаецца дадаць адно: калі матухна-прырода не адумаецца, дык злавіць зімовы настрой можна будзе толькі ў нашых лядовых палацах. Што ж, адрасы вядомыя!
Вольга СВІРЫДОВІЧ, “НТ”,
г. Івацэвічы.