будзе і далей крочыць ГА “Беларускі саюз жанчын”
Напрыканцы мінулага тыдня дэлегацыя берасцейскіх жанчын – актывістак абласной суполкі “БСЖ” на чале з яе старшынёй Ірынай Арабей – бралі ўдзел у V рэспубліканскай справаздачна-выбарчай канферэнцыі самай масавай грамадскай арганізацыі, якая сёлета адзначыла свой юбілей. Калі 20 год назад (на пачатку свайго станаўлення) у ёй налічвалася ўсяго 242 жанчыны, дык цяпер – больш за 183 тысячы! І з кожным годам шарэнгі арганізацыі пашыраюцца. А ведаеце, чаму? Бо саюз крочыць па шляху дабрыні, узяўшы пад сваё крыло самыя слабыя слаі насельніцтва, бо мацуецца любоўю, якую вылучаюць дзясяткі тысяч чуйных жаночых сэрцаў і якая неадольна прыцягвае да сябе падобныя…
Беларускі саюз жанчын заўсёды займаў канструктыўную, дзелавую пазіцыю, ён стаў адной з самых аўтарытэтных арганізацый у краіне – адзначалася ў прывітанні Аляксандра Лукашэнкі, якое агучыў намеснік кіраўніка Адміністрацыі Прэзідэнта Беларусі Валерый Міцкевіч. Па словах старшыні ГА “БСЖ”, старшыні праўлення Нацбанка Беларусі Надзеі Ермаковай, калі будуць моцнымі жанчыны на ўсіх узроўнях і ва ўсіх сферах – мацней будзе і Беларусь. Менавіта па ініцыятыве БСЖ быў заснаваны ў нас Дзень маці і аб’яўлены Год маці, Год дзіцяці, праведзены конкурс “Жанчына года”, рэалізаваны рух “У Беларусі – ніводнага пакінутага дзіцяці”. Беларускі саюз жанчын актыўна супрацоўнічае з уладай, шматлікімі дабрачыннымі суполкамі, падтрымлівае сувязі з замежнымі жаночымі арганізацыямі. Адным словам, віруе сапраўднае паўнакроўнае жыццё, скіраванае на тое, каб свет стаў яшчэ крышку дабрэйшым і больш міласэрным. Таму і не дзіўна, што сустаршыня ГА “БСЖ” Антаніна Морава, якая выступіла з дакладам праўлення аб рабоце ў 2006-2011 гадах і задачах на перспектыву, зрабіла акцэнт менавіта на канкрэтных справах. Прыемна, што, называючы лепшых з лепшых, Антаніна Пятроўна ўзгадала і брастаўчанак – генеральнага дырэктара ААТ “Лагуна” г. Брэста Наталлю Ільніцкую, памочніка рэктара УА “Баранавіцкі дзяржаўны ўніверсітэт” Рэгіну Венцэль, старшыню Пінскага гарадскога Савета дэпутатаў, ініцыятара стварэння Музея маці Ніну Кахновіч.
А колькі прагучала розных прапаноў! Сапраўды, чаму не стварыць рэспубліканскую Дошку гонару шматдзетных сем’яў як прыклад для пераймання маладым? Чаму б адну з залаў музея Вялікай Айчыннай вайны не прысвяціць жанчыне? А колькі ўзнімалася праблем! Але не гучала адчаю ці безвыходнасці, бо, як трапна заўважыла адна з выступоўцаў, калі за справу бяруцца жанчыны – яна будзе даведзена да завяршэння.
Сваім лідарам актывісткі БСЖ зноў абралі Надзею Ермакову (прычым – аднагалосна) – яе паважаюць, ёй вераць. Сустаршынёй перавыбрана Антаніна Морава, намеснікамі старшыні сталі Рэгіна Давідовіч і Святлана Сітнікава.
Крыху пазней прайшло пасяджэнне праўлення Брэсцкай арганізацыі, з якога вышэйупамянутая Наталля Ільніцкая і прэс-сакратар старшыні аблвыканкама Таццяна Гагакава выйшлі намеснікамі старшыні абласной суполкі “БСЖ”. “Нам ёсць над чым працаваць, – зазначыла Ірына Арабей. – У нас шмат жанчын, жыццё якіх і здзіўляе, і натхняе”. Думаецца, вясной 2012-га на традыцыйным конкурсе “Жанчына года” найярчэйшымі прадстаўніцамі Берасцейшчыны будзе захапляцца ўся краіна.
Галіна МІХАЛЕВІЧ, “НТ”,
г. Мінск.