Сюрпрыз на Каляды

Калектыў Ганцавіцкага раённага Дома рамёстваў удастоены спецыяльнай прэміі Прэзідэнта Рэспублікі Беларусь
На традыцыйнае пытанне, якое звыкла ішло пасля прывітання, як жыццё-быццё, начальнік аддзела культуры Ганцавіцкага райвыканкама Ірына Марцінкевіч на гэты раз не хавала задавальнення: “У чаканні другой навагодне-каляднай радасці. – І тут жа патлумачыла: – Спачатку стала вядома, што Агарэвіцкай студыі выяўленчага мастацтва “З рога ўсяго многа” прысуджана званне ўзорнага аматарскага калектыву, а 8 студзеня наша Марыя Муха, дырэктар раённага Дома рамёстваў, едзе ў сталіцу для ўдзелу ў цырымоніі ўручэння спецыяльнай прэміі Прэзідэнта Рэспублікі Беларусь…”
Тым больш што падобная пачэсная ўзнагарода ў галіне культуры – не першая на Ганцаўшчыне. У 2004 годзе за значныя дасягненні ў эстэтычным і маральным выхаванні падрастаючага пакалення яе атрымаў калектыў цэнтральнай раённай дзіцячай бібліятэкі. І вось праз сем гадоў той ні з чым непараўнаны гонар ганцавіцкія культработнікі перажываюць зноўку. А разам з імі – і мы, берасцейцы. Таму давайце сёння ў 21 гадзіну 40 мінут уключым Першы канал і разам з краінай парадуемся за калектыў Дома рамёстваў з Ганцавіч, за Марыю Муху, якая з рук Прэзідэнта Беларусі атрымае заслужаную прэмію – за адраджэнне і захаванне народных рамёстваў, за далучэнне моладзі да традыцыйнай культуры. За шчырую працу…
Галіна МІХАЛЕВІЧ, “НТ”,
г. Ганцавічы.